« “Dudular” | Aurten ere diferente izanen da »

Gauzurtz baten izenak asmatzen / Eneko Olasagasti / Susa, 1985

Gauzurtz baten izenak asmatzen Iñaki Camino / Argia, 1985-03-03

Lehen ere olerkiak idatzitakoa dugu Olasagasti, bakarka ateratzen duen aurreneko poema liburua hau den arren. Olerkiak 34 dira denetara, eta liburuaren erdialdean eta azalean ditugun marrazki ale horiek Joxemi Zumalaberenak denak.

Ez du Enekok oso poema luzeak idazteko joera, honelakoak ere badiren arren.

Badirudi, maitasuna dela Enekoren liburuaren hasierako zatian nagusi, azken olerkiak oso gai diferentez mamitzen baitira. Badira mozkorrei egindakoak, Donostiaren esnatzeari idatzirikoak, Beyrouth-eko haur erasotuei eginak, lagunentzakoak, mendiei, poemei eta askatasunaren ezinari jarritakoak, gaitzat kanutoak eta ofizinetako zuzendariak hartzen dituztenak…

Kalidadeaz hitz egitekotan, era askotako gauzak esan litezkeela dirudi, denetarik baitago liburuan: badira poemak lehenengo lerrotik azkeneraino esanguratsu eta ongi moldatuak direnak, indarra falta dutenak, baita olerki erdizkako batean zinez ederrak diren pasarteak.

Ezin ordea Olasagastiren irudiak aitatu gabe utzi, batzu benetan miresgarriak direlako, asmamen oso zorrotz batek burutuak, eta horrelakoak ugari dira gainera liburuan zehar, egiten dituen hainbat eta hainbat gogoeta orokorretan nahiz maitasun kontuzkoetan.

Lehen ere aitatu bezala, olerki guztiek kalidadearen aldetik maila homogeneo bat gordetzea lortzen ez badute ere, anitz dira liburu honek dakartzan alde interegarri eta ederrak.