« Sekulorun sekulotan | Amaia Lasaren paradisuetan »

Iraultza sobietarra eta literatura / Joxe Azurmendi / Gero, 1975

Iraultza sobietarra eta literatura Irastortza / Zeruko Argia, 1975-12-14

Joxe Azurmendiren beste liburu bat dugu Iraultza sobietarra eta literatura. Gero argitaldarian argitara du oraingo hau. Edonorrekin lan egiteko prest den gizona dugu Joxe. Bestalde, argitaldari guziei libururen bat eskaintzeko hainbat lan egiten du.

Liburu hau ez du orain berriro idatzia. Presaka eta beste giro baterako idatzi zuen. Baina azken orduko orrazkeraz eta jorraz gaurkoturik eman digu.

Jakin-en argitara zuen Kultura proletarioaz eta Jakin-en argitaratuko duen Errealismo sozialistaz deitu liburuen senidea dugu Gero-n argitara eman duen liburu hau.

“Honek izan behar zuen hirurotan lehenengoa. Beste bientzat zimentarri bezala. Hirurak lan bat dira, estudio bat bera, Euskal Herriko problematika bat eta berari begira eginda”, dio egileak.

Intelligentsia ideokrata, klasikoak: errealismo kritikoaren pesimismoa (prosa), iraultzaren bezperako euforia (poesia), kapitulu bat tartean: euskal poesiaren iluna, iraultzari buruz-buru, proletkultur eta idazle proletarioak, bidelagunak eta literatura sobietarraren hastapenak dira liburu honetan aipatzen eta jorratzen diren gaiak.

Egileak dioen bezala “begi bat Errusian eta bestea Euskal Herrian” egina da liburu hau.

Ezkerraren hutsuneak eta akatsak sarri aztertu ohi ditu Joxe Azurmendik. Baina ez eskuindarren jokabidea sendo dadin, noski, geuron buruak aztertuz aurrera egin dezagun baizik.

“Jokabide honek, luzarora, ezkerraren gaisotasuna sendatu ordez, eskuindarren eragina gonfirma lezake” egotzi zion Azurmendiri Begiarmenek Sei idazle plazara deitu liburuan.

Joxe Azurmendi ez da ari uste horretan.

Arinkeriazko eta axaleko ezker joerak arbuiatzen eta astintzen ditu Joxe Azurmendik. Jokabide honek ezkerra sendotuko du luzarora, ezpairik gabe, gure ustez.