susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« On egin! | Mende bat hitzetan »

Orbanak / Juan Ramon Madariaga / Olerti Etxea, 2001

Ordena kaosean Javier Rojo / El Correo, 2001-06-20

Zarautzeko Olerti Etxeak formatu txikiko liburuen bilduma berri bati ekin dio. Lehenengo alea Juan Ramon Madariagaren “Orbanak” izeneko poema liburua dugu. Izen honekin poeta honen antologia eskaintzen zaio irakurleari. 1989.ean Imentzioaren pergamuak deitu zen lehenengo liburu hartan argitaratu ziren poema batzuetatik hasi eta liburu honetan lehenengoz ezagutzeko ematen diren poema argitaratu gabeekin bukatuta, idazleak orain arte burutu duen ibilbide poetikoaren berri izan dezake irakurleak.

Hasierako poemetan hizkuntzaren balio estetikoak nabarmentzen ziren, iparraldeko euskalkiak gogorazten dituen idazkera erabiliz. Joera estetizista hau, moteldu egin da denboraren poderioz, eta idazkera biluziago, estilizatuago eta gardenagoa erabiltzera jo du idazleak. Hotsaren estetikatik kontzeptuaren estetikara iragan dela esan daiteke. Edonola ere, aldaketa honek poetaren merezimenduak nabarmentzeko balio izan du, nire ustez. Madariagaren poesia munduan nolabaiteko ordena baliatzen duenaren poesia da, sentimenduen adierazpena baino areago, unibertsoa gizakien eskueran, neurrian jartzeko bidea. Antologia honetako hitzaurrean adierazten den ildotik, hitzaren laguntzaz poeta ordenaren bila dabil kaosean, eszeptismorik falta ez bada ere.