« Gerra elegantea | Mendea laburbilduz »

Bi argazki eta hainbat polaroid / Felipe Rius / Pamiela, 1999

Ihesi nahian Javier Rojo / El Correo, 1999-12-29

Felipe Riusek narrazio liburu interesgarria burutu du Bi argazki eta hainbat polaroid izena duen lan honetan. Liburuak bi atal nagusi dauzka. Lehenengo atalean, liburuaren zatirik handiena osatzen duen atalean hain zuzen, zortzi narrazio agertzen dira, non pertsonaiek sentitzen duten ihes egin beharra funtsezko osagaia den. Izan ere, pertsonaia nagusiak, hogeita hamar urtetatik berrogeitara bitarte horretan daudelarik, beren ohiko mundutik itzurtzeko grinak harrapatuta daude. Helduarora iritsi dira ia-ia konturatu gabe, eta egoera horretan badirudi errealitatetik ateratzeko nolabaiteko bidea asmatu nahi dutela: ihes egin, bidaia baten bidez batzutan; bestetan, edarian edo drogan (suizidioaren aldaki bigunak) aurkituko dute pertsonaiok inora ez daraman bidea. Bigarren zatiko testuak narrazioaren eta artikuloaren erdibidean daude, eta oso eskematikoak dira. Literaturaren ikuspuntutik interesgarriagoak iruditu zaizkit lehen ataleko istorioak. Baten batek esan lezake topikoz beterik daudela, eta, egia esan, ez da horrelakorik falta, adibidez, galtzaileen mitifikazioa egiten denean. Hala ere, Riusek idatzi duen liburua kontuan hartzekoa dela uste dut, euskal literaturan ixilik egon den belaunaldi baten ikuskera eskaintzen baitigu.