« Euskararen garatze larria | Gizaldiaren kronika »

Churchill / Joseba Arruti / Elkarlanean, 1999

Churchill-en bizitza Javier Rojo / El Correo, 2000-05-17

Joseba Arrutik Winston Churchill-en biografia txikia eskaini dio liburu honetan euskal irakurleari. Hemen Churchill, biografia baten protagonista bihurtzean, narrazio baten pertsonaia nagusia den aldetik interesatzen zait batez ere, haren ibilbide politikoa baino areago. Honelako biografietan ohikoak diren parametroen barruan mugitzen da idazlea. Pertsonaia goraipatzeko joera dauka, nahiz eta zenbaitetan alde ilunak ere aurkeztu. Askotan oso ezagunak ez diren ezaugarriak jakinarazi nahi dizkigu, batez ere bitxiak eta xelebreak badira. Ez dira falta, bestaldetik, honelako pertsonaiek egoera berezietan esan ohi dituzten esaldi ospetsuak… Honetaz esan dezadan, bidenabar, pertsonaia ospetsuek esan omen dituzten esaldi ospetsuak esatean berebiziko zortea daukatela: ondoan beti dute norbait, halako esaldia gerorako gordeko diguna… Pertsonaia, sehaskatik ia, destino baten jabe izango bailitzan aurkeztuta dago. Destino horri eutsi eta bere ekintza guztietan hura betetzeko egiten dituen ahaleginak ikusten dira. Badakit hau biografietan erabili ohi den baliabide topikoa baino ez dela. Ezin zaio, ordea, besterik eskatu honelako dibulgaziozko liburu bati: pertsonaia honen berri ez dutenei ezagutaraztea, era atsegin batez.