susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Mentxakaren aitorpena | Mixa eta konpainia »

Hitza azti / Iñaki Arranz / Alberdania, 2006

Euskararen baliabideak Javier Rojo / El Correo, 2006-10-25

“Hitza azti” euskararen gainean aritzen den saiakera liburua da. Hizkuntza, hizkuntzari erreferentzia egiten dion neurrian aztertzen du Iñaki Arranzek, euskarak dituen baliabide batzuen berri emateko. Estilo liburua dirudi batzuetan, erretorika eskuliburu praktikoetatik hurbil dagoena. Euskara erdigunean jarrita, hizkuntzaren alderdi materialean (hitzen hotsak, adibidez) oinarritzen da idazlea, baliabide desberdinen sailkapena egiteko. Berezitasun bat dauka sailkapenak: euskararen ezaugarrietatik bertatik hartu ditu sailkapenerako irizpideak, batzuetan alderdi taxonomiko honek gainez egiten duelarik. Eta baliabideen sailkapenarekin batera, nonahitik hartutako adibideak, idazlea hizkuntzaren aurrean sen bereziaren jabea dela erakusten dutenak. Liburua, bestaldetik, hizkuntzarekin jolasteko deia ere bada, bertan agertzen diren baliabide asko hizkuntzaren irakaskuntzan erabiltzen diren jolasekin pareka baitaitezke. Alderdi honetatik, ez da ahaztu behar OULIPO taldeak egiten zituen ariketetan ere oinarritzen dela. Baina liburua euskarak pairatzen duen egoeraren zordun ere denez gero, gure artean nabarmentzen den filologizazioaren adibide hautatutzat ere har liteke.