susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Heriotzaren gerizpean | Egun bat Bobby Sandsen infernuan »

ETAren hautsa / Joseba Zulaika / Alberdania, 2006

Eta orain zer? Javier Rojo / El Correo, 2006-09-13

ETAk iragarritako su-etena abiapuntua delarik, Joseba Zulaikak azaldu nahi izan du zein izan daitekeen hemendik aurrera agertzen den panorama, “ETAren hautsa” izenburuko saiakera honetan. Liburuak, beraz, ezin du gaurkotasun handiagorekin agertu, batzuetan gaurkotasun hori gehiegizko presaren itxurapean agertzen bada ere. Panorama azaltzeko ETAren jatorrietara jotzen du Zulaikak, horretan aurkitu baitaitezke etorkizunerako zenbait iradokizun. Egia esan, idazleak ETAren historiaz hitz egiten duenean, neurri handi batean (neurri osoan ez esateagatik) bere belaunaldiaren historiaz hitz egiten du, bere buruaz nonbait. Baina, bestaldetik, Joseba Zulaika antropologoa da, eta antropologiaren ikuspuntutik ikusten du azken urte hauetako historia. Gauzak honela, gertakariak sinbologiaz beterik agertzen diren aldetik aztertzen ditu gehienetan. Hau da, eta barkatu sinplifikazioa, gertakariak narrazio bihurtzen ditu eta gero narrazio hori sinbolismotik interpretatzen du. Izugarrizko garrantzia ematen dio su-etenari, bere ustez, ETA treguarekin behin-betiko desaktibatuta geratu baita. Denboraren perspektibarik gabe, jarrera hau esperantzaren aldeko apustutzat har daiteke.