susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Amaren eskuak | Idazlearen egunerokoa »

Arima enkoniatuak / Xabier Mendiguren E. / Elkar, 2006

Arima enkoniatuak M. Egimendi / Aizu!, 2006-09

Lau kontakizunek osatzen dute liburu honek idazle beraren Bihotz gosetien kluba ekartzen du gogora. Egitura aldetik, nahiko antzekoa da, eta narrazioen argudioari dagokionez, berriz, orduan bihotz gosetiak zirenak, orain arima enkoniatu bihurtzen dira, gauzatu gabeko “amodio” istorioen protagonistak Amodio hitza kakotx artean agertzearen arrazoia kontatzen zaizkigun harremanen nolakotasunean datza, ez baitago amodiozko istorio tipikorik, baizik eta erakarpena, erantzunik gabeko maitasuna, adiskidetasuna… Bada, ordea, alde bat. Aurrekoan kontakizunek amaiera aske uzten zuten, baina kasu honetan amaitutako istorioak dira kontatzen direnak, bai iraganean gertatuak direlako, bai etorkizunik ez dutela argi erakusten dutelako.

Hala ere, lau narrazio hauetatik bi dira, batez ere, aipagarriak, bi azkenak hain zuzen ere, aurrenekoek ez baitiote irakurtzeko interesari larregi eusten. Lehenengoa, aukeran, luze samarra suertatzen da, irakurleak ia hasieratik baitaki nola amaituko den. Eta bigarrenak, berriz, ez du gauza handirik kontatzen, agian kontatzeko gauza handirik ere ez dagoelako. Baina beste biak ezberdinak dira, protagonistak helduagoak dira, eta zer kontatu gehiago dute. Eta horrek irakurlearen interesari eusten dio bukaerara arte.

Bestela, Mendiguren Elizegiren idazkera beti bezain arin eta irakurterraza da, oso egokia euskararen sareetan erabat aske mugitzen ez direnentzat.