susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Kalez kale, gorriak ikusten | Azken muturrerainoko maitemina »

Ezkatak / Leire Bilbao / Susa, 2006

Itsasoa eta ispilua Javier Rojo / El Correo, 2006-04-12

Leire Bilbaok poesiaren alorrean eskaintzen duen lehen emaitza da “Ezkatak” izeneko liburu hau. Poesia da, eta generoari askotan eskatzen zaion bezala, hasiera batean lirikaren ohiko bideetatik abiatzen dira poema hauek, poetarekin identifika daitekeen “ni” eta zehaztu gabea den “zu” batzuen arteko elkarrizketa moduko batean gauzatuak. Edonola ere, poesiaren subjektuok inposatzen dituzten mugak gainditzen saiatzen da idazlea, eta hasierako poemetan ia erabateko den jokaera hori motelduko da liburuan aurrera egin ahala, beste pertsona batzuk ere subjektu poetikoen esparruan sartuta. Badirudi poema liburu honetan irudi batzuk klabeak direla, adibidez, itsasoarekin zerikusia daukatenak, idazlearen jatorria kontuan hartuta erraz ulertzekoa dena. Dena dela, irudi klabe horien artean inportanteena ispiluarena iruditu zait, liburuan zehar agertzen diren planteamenduak irudi horretan laburbilduta agertzen baitira. Irudi honen bidez identitatearen gaia agertzen zaigula esan daiteke, izatearen eta itxuraren arteko lehia zaharra berrituta. Izan ere, idazlea batzuetan poeta moduan ez ezik, pertsona moduan ere bere tokia bilatzen ari dela ematen baitu.