« Saiakera mozorrotua | Misterioa eta ezustekoa »

Zorte Ona / lex Rovira / Fernando Trías de Bes (Eskarne Mujika) / Alberdania, 2005

Parabola berria Javier Rojo / El Correo, 2006-03-29

Arrakasta handiko liburua omen da “Zorte Ona” izeneko narrazio hau, Alex Rovira Celma-k eta Fernando Trías de Bes-ek idatzitakoa, orain euskal itzulpenean datorkiguna. Halaxe adierazten zaigu kontrazalean. Liburuak, narrazio bat, alegia bat izango balitz bezala, azaldu nahi du zeintzuk diren Zorte Ona (horrela, hizki larriekin idatzita) lortzeko giltzak. Izan ere, idazleek aurkitu omen dituzte giltza hauek eta hamar mandamenduak bezala, dekalogo batean azaltzen dizkigute. Ipuina dekalogo hau azaltzeko parabola izango litzateke. Antza denez, negozio eskola postmodernoak erlijio berria osatzen hasi dira, eta, edozein erlijiok bezala, eskola hauek beren mandamenduak eta itun sakratuak behar dituzte. Baita profetak ere. Honelako liburuek erakutsi nahi dute arrakastaren giltza norberaren eskuetan dagoela, hori lortzeko baldintza egokiak jartzekotan. Azpititulua ere esanguratsua da “Ongizatea iristeko giltzarriak”: paradisu berria agintzen digute, beraz. Edonola ere, liburuak berak erakusten du zein den arrakasta lortzeko biderik egokiena: idazleen adibideari jarraituta, nola izan arrakastatsua azaldu behar duen liburua idatzi eta milioika ale saldu irakurle ingenuoei.