susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Harrapazank | Love, love, love »

Bekatuak / Ana urkiza / Elkar, 2005

Bekatuak M. Egimendi / Aizu!, 2005-11

Ana Urkiza (Ondarroa, 1969) helduentzako bigarren ipuin bildumarekin datorkigu. Desira izoztuak plazaratu zuen 2000n, eta Bekatuak aurkezten du orain. Liburua 70 ipuinez osatuta dagoela esan arren, ez pentsa ipuinaren egitura klasikoaren aurrean gaudenik. Izan ere, ipuin hauetako batzuk oso lerro gutxikoak dira, eta badira lerro bakarrekoak ere. Horrek batzuetan irakurlea bere buruari “eta zer?” galdetzera eramaten du, ipuin horiek kontakizun luzeagoak, edo osatuagoak, egiteko ideiak besterik ez balira bezala. Horrekin irakurlea hausnarketara bultzatu nahi du idazleak, estilo zuzen eta erraza erabilita.

Bestalde, 70 ipuinok ez dira guztiz independenteak. Gaika banatuta daude (gonbita eta harrokeria, mendekua eta utzikeria, desleialtasuna, esplotazioa, tentazioa…) eta batzuetan ipuin batek bi zati ditu, bakoitza gai ezberdin baten barruan. Bada beste kontakizun bat, Itziar, Joseba eta Almuhud protagonistatzat dituena, berauek osatutako hirukotearen barruko harremana momentu ezberdinetan erakusten duena, baina zatiak aurkibidean islatu gabe. Beraz, ez da bizpahiru ipuin irakurri eta hilabete barru jarraitzeko utz daitekeen liburua, ipuin batzuen haria galdu nahi ez bada behintzat.

Bekatua dena eta ez denaren arteko marra mugitu egin dela adieraztea ei da liburu honen helburuetako bat. Egia esan, hemen agertzen diren egoera guztiak bekatuzkoak badira, erruki!