Mende berrirako ipuinak / Antologia / Erein, 2005

Mende berrirako ipuinak Ana Unanue / Aizu!, 2005-09

Istorioak: euskal ipuinen antologia honetan Bernardo Atxaga, Harkaitz Cano, Javi Cillero, Juan Garzia, Arantxa Iturbe, Anjel Lertxundi, Karlos Linazasoro, Pello Lizarralde, Xabier Montoia, Inazio Mujika, Lourdes Oñederra, Ixiar Rozas, Joseba Sarrionaindia eta Iban Zalduaren 18 ipuin topatuko ditu irakurleak. Hautaketa Mari Jose Olaziregi EHUko irakasle eta literatur kritikariak egin zuen, Renoko Basque Research Centreren ekimenez. Antologia ingelesez argitaratu zuten lehendabizi eta duela zenbait hilabete euskaraz eman du Ereinek.

Emaitza: 1980ko amaieratik hasi eta gaur egunera arteko euskal ipuingintzari errepasoa ematen dion liburua. Nik gusturago irakurri nuen Iñaki Aldekoaren “Euskal ipuinen antologia bat” (Alberdania, 1993), baina horrek ez du ezer esan nahi, ez ipuinak hobeak zirenik ezta aukeraketa egokiagoa izan zenik ere, baizik eta garai hartan gazteagoak ginela eta errazago asetzen ginela.

Onenak: antologia guztiak dira pertsonalak, hautaketa egiten duen irakurlearen gustuaren menpekoak. Antologiaren antologia egitekotan, honako hauek aukeratuko nituzke: Javi Cilleroren “Musu bat ilunpetan”, Pello Lizarralderen “Un ange passe”, Xabier Montoiaren “Ikatza bezain beltz”, Inazio Mujikaren “Itoak ur azalera bezala” eta Iban Zalduaren “Bibliografia”.