« Kafe kaputxinoa bezala: kontzentratua, iluna eta usaintsua | Berroroituz »

Euskal bidaiarien memoria. Esplorazioa eta abentura / Angel Martinez Salazar / Elea, 2005

Euskal bidaiariak Javier Rojo / El Correo, 2005-04-20

Angel Martinez Salazarrek idazki askotan jarraitu nahi izan dio euskal bidaiarien presentziari. Batez ere Amerikan, baina Asian edota Afrikan zehar ere bidaiak egin zituzten euskaldunen istorioak kontatu izan ditu behin baino gehiagotan. Horrelako istorioen laburpena edo bilduma da liburu hau, “Euskal bidaiarien memoria. Esplorazioa eta abentura” izenburua duena. Atalik handiena, Amerikan ibili diren euskal bidaiarien istorioek hartzen dute, euskaldunen presentzia ikusgarria izan baita Amerikako lurraldeak Espainiako koroarentzat konkistatzean, era nabarmen batez izan baitute euskaldunek mundua korritzeko zaletasuna. Gizatalde desberdinak (soldaduak, abenturazaleak, misiolariak zein piratak) aurkitzen ditugu halako bidaietan eta askotan beren kroniketan utzi digute horren berri. Bidaiari askoren presentzia aipatu nahi izan du idazleak bere liburuan, eta honek, jakina, sakontasuna kendu dio idazlanari. Ondorioz, askotan abenturak elkarren antzekoak dira oso, beti abentura berberaren aurrean egongo bagina bezala. Edonola ere, liburu hau abiapuntutzat har dezake irakurleak, abenturazale bakoitzaren istorioaren ondoren bibliografia jarri baitu idazleak. Izan ere, liburu interesgarri hau honelako gaian sartzeko egokia da.