susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Itzalen xerka, egiaren aztarnak | Beroa »

Isiltasunaren adabakiak / Karlos Linazasoro / Pamiela, 2004

Zipriztin-ideiak Javier Rojo / El Correo, 2004-02-25

Karlos Linazasoro idaztearen gaixotasunak jota omen dago. Gaixotasun honetatik sendatzeko, idaztearena neurri txikitan hartzea erabaki du, honelako kasuetan gertatu ohi den bezala, poliki-poliki sendatu behar baita, bat-batean osatzea ezinezkoa delarik. Honen ondorioa da “Isiltasunaren adabakiak” izeneko liburua, aforismoz edo, idazleak nahiago duen moduan, apuntez egindako liburua. Idatzi beharretik sortutako liburua da, idatzi behar horretatik bertatik askatzeko. Mila aforismotik gora biltzen dira, ia-ia pentsamendu solteen egunerokoa osatzen dutenak. Batzuk jatorrizkoak, bestetzuk, gustuko idazleengandik hartuta (batzuetan ezinezkoa da batzuk eta besteak bereiztea), zipriztinak bezalako ideiak agertzen zaizkigu. Bi gai iruditzen zaizkit nabarmenenak, eta biak lotuta agertzen dira: heriotza eta denboraren igarotzea, batetik, eta literatura, bestetik. Izan ere, literaturak denbora izozteko (heriotzari iruzur egiteko) bidea eskaintzen du. Askotan esaldi bakarraz ostutako aforismo hauek paradoxan oinarritu ohi dira, begi-bistakoaren atzean ezkutatzen den beste errealitate hori erakutsi nahirik… Linazasorok idatzi beharretik askatzeko idatzi nahi izan zuen liburua, baina liburuak bere amaraunean harrapatu zuen berriro.