susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Bihotzean daramagun mundua | Gorputza ezbaian nola emakumeak hala, literaturaren joko zelaian »

Maren / Alaine Agirre / Erein, 2017

Maren, Libe eta Oier Mikel Urkixo Aierdi / Begitu, 2019-05-02

Gazteentzako literatureagaz jatorku Alaine Agirre oingo honetan. Eta adierazo behar dogu eskertu egiten dala holango proposamen freskoakaz topo egitea. Halanda be, betiko kontua… Gazteentzako literaturea, gazteentzat baino ez da? Zaharrok ezin geinke gazte-literatureagaz disfrutau?

Txandaka saileko hiruko honek gazte zein helduentzat egindakoa emoten dau, eta halantxe aitortu dau sarri autoreak: ez leuke gura liburu honeek gazteentzako literatura moduan klasifikatzerik.

Gure protagonistak 16 eta 20 urte bitarte daukiez, eta munduari, besteai eta euren buru eta barrenai begiratzeko modu diferenteak. Gauza asko daukiez deskubriduteko: sexua, harremanak, askatasuna, dudak, bildurrak, mina, gaixoa…

Euren errealidadeak bat egin, eta alkarregaz bidaia bateri ekingo deutsie. Bidaia horretan, aurretik eukiezan uste eta pentsakera sendo eta seguruak jausten hasiko dira, krisian sartuko dabez-eta hainbat pasadizuk. Euren barrenekoak eta kanpokoak hobeto ezetuteko okasinoa izango dabe, eta leiduten dogunok aldaketa eta transformazino horreen testigu bihurtuko gaitu Agirrek.

Maren dogu lehenengoa, eta ha leiduten hasi eta lasterrera, atrapaturik geratuko gara, gazte zein heldu. Gaur egungo gaztetxuak erabilten dabezen erreferentziak erabili dauz idazleak. Igarten jako gazteak literaturara bildu gura dauzala, eta, horretarako, estilo labur, zuzen eta dibertiduan eskribidu dau. Hasikerako eszenak be irakurlea atrapau gura dau: gaztetxu biren arteko sexu eszena esplizitu eta patetikoa. Istorioa arin doa, eta konturatu orduko, lehen liburua akabau, eta bigarrenagaz hasteko gogoa eukiko dogu.

Guraso, irakasle, hezitzaile eta beste askoren ardurea izaten da gazteak liburuetara hurreratzea. Ba horixe berori opatzen deusku idazle bermeoztarrak. Gure gazteak literatureagaz disfrutetako hirukoa, eta geuk be sano gustura leiduko doguna: Maren, Libe eta Oier.