susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ireki ateak | Magma »

Ipuin irlandarrak / zenbait egile (Karlos del Olmo) / Hiria, 2012

Irlandako ipuinak Javier Rojo / El Diario Vasco, 2013-03-08

Karlos del Olmok aurkezten duen liburu honek izenburu bat baino gehiago ditu. Alde batetik, azalean Ipuin irlandarrak irakur dezakegu, izenburu deskriptiboa, liburuaren barruan aurkituko duguna nolabait aurkezten diguna. Kontrazalean, ordea, Patuaren Uhartea deitzen dela adierazten da, eta liburu barruan bi izenburu hauek loturik ikusiko ditugu, Innis Fodhla izenareldn eta Eireko amamak kontatzen zizkigun ipuinak azpititulurekin batera. Izan ere, honelako informazioa kontuan hartuta, irakurleak ideia egin dezake liburuaren barruan zer ikusiko duen, bertan laburbilduta agertzen baita liburuaren edukia. Alde batetik Irlandako ipuin tradizionalak kontatzen zaizkigu bertan. Ipuinak, beraz, ez dira originalak, eta idazleak argi utzi du hori lehen momentutik hitzaurrean: Fairy and Folk Tales of the Irish Paseantry izenburuko liburuan, W.B. Yeats-ek argitara emandako liburuan, oinarritu da ipuinen argumentuak jasotzeko. Baina Del Olmoren liburuan ematen den informazioaren arabera Yeats ere ez zen originaltasunaren bila joan liburu hori argitaratzean, liburu horretan agertzen diren ipuin asko beste idazle batzuen eskuetatik baitzetozen.

Gauzak honela, Karlos del Olmok egin duen lana izan da Yeats-en bildumatik ipuin tradizional batzuk hartu, testuinguru batean kokatu eta ikuspuntu berezi batetik kontatzea. Eta horretarako narrazio enmarkatuaren teknika erabili du, Mila gau eta bat gehiago ospetsuan bezala.

Del Olmo, bestalde, oso trebea da ipuinak berridazterakoan ahozko kontaketaren itxura emateko. Ipuin hauetan Irlanda mitiko bat agertzen zaigu, lurralde hark Innis Fodhla izena zuenekoa, non izaki mitikoak pertsona arruntekin batera agertzen diren, hauen bizitzak nahasten edo errazten. Eta irlandarrei dagozkien topikoak derrigorrezkoak direnez, zurruta eta liskarra dira nagusi. Haurren neurriko istorioak kontatzen dira bertan, liburuaren formatua irakurle helduentzako egokiagoa izan arren.