Traizioak / Iban Zaldua / Erein, 2001

Traizioak Gotzon Hermosilla / Aizu!, 2002-06

Istorioa: Istorio bat baino gehiago dago liburu honetan. Berrogei istorio, zehatz esateko. Gehienak oso laburrak, bizpahiru orrikoak. Guztietan traizioa agertzen da: aberriari, memoriari edo literaturari egindako traizioak. Baina hori bezain aipagarria da Zalduak duen abilezia, gertaeren atzean ezkutatzen den bestelako errealitatea agerian uzteko. Esan dezakegu istorioak bi eratara konta daitezkeela: logika arrunta erabilita, edo Zalduak proposatzen digun begirada bihurri eta aldrebesaren ikuspegitik. Borgesek bezala, Zalduak ere paradoxak, aburdoa, magiaren ukitua, logikaren kontrako arrazoia, amaiera harrigarriak ditu gustuko.

Ipuin bat: Aipatzeko moduko ipuin asko agertzen da liburu honetan, baina gaur hiru minutu besterik ez badauzkazu irakurtzeko, mesedez, “Ogia besapean” izeneko ipuina aukeratu, eta ziur nago bihar denbora luzeagoa eskainiko diozula liburu honi.

Baina…: Hemen jasotzen diren ipuin gehienak Egunkarian eta El País-en agertuak dira. Beraz, eguneroko prentsa irakurtzeko ohitura badaukazu, agian istorio asko ezagunak zaizkizula begitanduko zaizu.

Aipagarria: Ipuin asko barregarriak eta txundigarriak dira. Olgetan idatzitakoak dirudite. Baina adi egon: beste askotan, Zalduak bizitzaren absurdoaz, Euskal Herriko egoeraz edo eguneroko hipokrisiaz duen iritzi garratza igarri daiteke.