susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Irribarrea galtzen danean | Belaunaldi esperientzia baten irudi etereoa »

Paristar euskaldun bat (ni neu...) / Txomin Peillen / Kriselu, 1987

Paristar euskaldun bat Dabid Zuazalde / Argia, 1988-03-13

Joxemartin Apalategik zuzendutako “Antropologiaren Euskal Bilduma”ko 19.a egiten du honek. Egia da bai, edozer erabil daitekeela antropologiarako material. Ez da horren seguru ordea edozein gauza antropologiazko liburutzat aurkez daitekeen. Gu ezjakinak gara kontu hauetan, baina Txomin Peillenen liburu hau hartu eta zalantza handi samarrak sortu zaizkigu genero eta sailkapena direla eta.

Inork galdetuz gero, zera esango genuke: hau Peillenen autobiografia bat da.

Ondoren nabardura eta xehetasunak letozke. Adibidez, 3. pertsonan idatzia izatea —horrek noski, ez dio duen edo ez duen baino objetibotasun gehiago erantsiko, bistan denez—. Beste zehaztapen bat: kapitulo moduan funtzionatzen duten 35 galdera laburretan zatitzen da, antropologiazko galdegietan erabili ohi direnak bezalako galderak: gurasoak, jaiotetxea, eskolatzea, anai-arrebak eta abar. Gaztarora arteko urteak aipatzen dira gehienbat, hortik aurrerakoak interes gutxi bait dute antropologiarako. Galde-erantzunen artean, 20 argazki ditugu, Txomin adiskide eta ahaideekin, eta honek hari bidali izan dizkioten euskarazko gutunak agertarazten dituztenak.

Ez dakigu antropologia askorik ikasteko balioko ote duen, baina Txomin Peillen hobeki ezagutu nahi duenak edo Zuberoako deseuskalduntzeaz haboro jakin nahi duenak, guzti horien gainean informazioa jasotzeko aukera du liburu honen bidez.