« Sancho Panza eta Aitor koadrila berekoak dira | “Carpe Diem” »

Bapatean 91 / Askoren artean / EHBE, 1992

Gustura irakurri eta gordetzeko Joxe Beristain / Euskaldunon Egunkaria, 1992-09-04

Urteroko ohiturari eutsiz, Euskal Herriko Bertsolari Elkarteak iazko bertsorik onenak bildu dizkigu argazki ederrez apaindutako liburu eder eta aberats batean. Bapatean egin eta botatakoak idatzita aurki ditzakegu “Bapatean 91” liburuan. Gustura irakurtzeko eta ondo gordetzeko moduko liburua, beraz.

Zaldubik egindako lanak ez du ordainik. Herriz herri saioak grabatzen etenik gabeko lana egiten du bertsozale zarauztarrak, gustuz eta era egokian. Denetara iristea erabat ezinezkoa da, jakina, baina saio asko eta asko dira Zaldubik harrapatzen dituenak, eta bere lanari esker irakur ditzakegu saio horietako bertsorik onenak, hiru hilabetean behin edo “Bertsolari”‘ aldizkarian eta urtero-urtero “Bapatean” bilduman.

Bestelako nobedade interesgarririk ere badu aurtengo “Bapatean 91” honek: EHBEk bapateko bertsoen transkribaketarako erabaki dituen irizpideak. Alde honetatik, behar-beharrezkoa zen horrelako lanen bat egitea, eta hemen dugu, hain zuzen ere, lan hori.