« Irakurketak eta patroiak (II) | Barne haizearen jirak »

Euskal kantagintzan urrats berri / Andoni Lekuona / Egan, 1998

Belaunaldi bat Javier Rojo / El Correo, 1998-10-14

Andoni Lekuona soziologoa da lanbidez, baina afizioz, kantagintzan aritzea gustatzen zaio, hain zuzen ere kantuen hitzak sortzen eta egokitzen. Bere hitzetan esanda, “hizgilea” da kanta munduan. Egan aldizkariak gehigarri gisa argitaratutako liburuxka honetan, Lekuonak moldatutako kantuen halako antologia pertsonala argitaratu du, sortu zireneko datuez eta partiturez ere lagunduta daudelarik. Kantu batzuk Lekuonak berak sortuak dira, batzutan egoera berezi batean kantatuak izateko; beste batzuk, ordea, kantu ezagunen euskal egokipenak. Dena dela, esan bezala, Lekuona hitzen arduraduna da, ez doinuarena, hauek ezagunak edo besteren batek eginak baitira. Belaunaldi baten lekukotzat hartu daiteke liburu hau. Hain zuzen ere, hirurogeiko belaunaldia (nolabait esateko) islatuta agertzen da liburu honetan. Eta hau ikusteko, nahikoa da han aipatzen diren izen batzuk hona ekartzea: antologian agertzen diren kantu batzuk Imanolek ezagun bihurtutakoak dira; bertan badira Brel edota Moustaki-ren zenbait kanturen egokipenak ere. Ezin ahaztu, bukatzeko, egilearen hitzaurrea, non bere ibilbidearen azalpenaz gain, balaunaldi horrek jasandako zenbait gorabehera ere irakur daitezkeen, partaide baten lekukotza zuzenak daukan balioarekin.