susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Mac Guffin eta beste istorioen inguruan | Bilbo, Bilbao »

Haritchabaletaren bizia. Don Juan eta bere adixkidiak / Jean Baptiste Constantin / EEE, 1997

Kontakizun bitxiak Javier Rojo / El Correo, 1999-04-28

Euskal Editoreen Elkarteak plazaratu berria duen liburu honetan (plazaratu berria baita, argitarapen datak bestelakorik adierazten badu ere), Jean Baptiste Constantin (1847-1922) idazle zuberotarrak mende hasieran idatzitako bi nobela labur argitaratu dira, Patri Urkizuren ardurapean. Lehenengo narrazioan, Euskal Herriko zenbait tokitan ia-ia mitiko bihurtu den Haritchabalet apezaren bizitzaren zenbait pasarte kontatzen zaizkigu, helburu bikoitzarekin kontatu ere: batetik, apez hori dela-eta, gezurtzat zituen zenbait kontu argitu nahi izan zituen Constantinek; eta, bestetik, irakurlearentzat dibertigarria izan litekeen kontakizun bat eskaini. Bigarren narrazioan, alderdi dibertigarri hori azpimarratuta geratu da, Don Juan izeneko pertsonaiak eta honen adiskideek Erronkarira egiten duten txango batean gertatu zaizkien gorabehera barregarriak kontatzean. Bi narrazioak era zalu eta bizi batean garaturik daude, mende hasierako zubereraz. Edizio honetan ortografia gaurkotu bada ere, ezaugarri dialektalak bere hartan geratu dira. Horregatik, honelako hizkeran idatzitako liburuetara ohituta ez dagoen irakurleak agian zenbait oztopo izan dezake, baina pazientzia piska batekin kontakizun berezi hauen xarma dastatu ahalko du.