susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Egunerokoa poesia bihurtzen denean | Matias, izorratu gaituk berriz »

Lux mundi / Askoren artean / Euskal Idazleen Elkartea, 2005

Ipuinak Pirinioetatik Javier Rojo / El Correo, 2005-09-28

Zenbait idazle euskaldun eta katalan bildu ohi dira urtero Pirinio aldean. 2004. urtean Vall de Boi-n izan zen topaketa eta orain, topaketa hori abiapuntutzat hartuta, han egondako idazleek burutu duten ipuin-antologia argitaratu da. Izenburua, pixka bat handinahia: “Lux mundi”. Euskaldunen artean idazle hauen izenak irakurtzen ditugu: Itxaro Borda, Aingeru Epaltza, Iñaki Friera, Maite Gonzalez Esnal, Gerardo Markuleta, Fito Rodriguez, Andoni Sarriegi eta Urtzi Urrutikoetxea. Istorio guztietan antzeko osagaiak agertzen dira, osagai multzo zehatz batetik egindako aukeraren ondorioa baita, itxura guztien arabera, antologia hau. Pertsonaiak Pirinioetan daude edota hara doaz txango; arte erromanikoari buruzko aipamen ugari agertzen zaizkigu; misantropiaren apologiaren ukituren bat ere nabarmena da. Melankolia tonua nagusi da askotan honelako istorioetan, Pirinioetan pertsonaiek atzean utzitako haurtzaroaren oroitzapena berreskuratzen egongo balira bezala. Eta honez gainera, naturalezaren nostalgia hiritarra, jatorrietatik hurbil sentitzearen beharra. Salbuespenen bat alde batera utzita (Epaltzaren ipuina, adibidez), ironia falta da. Edonola ere, ez da ahaztu behar liburuaren jatorriak mugatzen duela emaitza.