susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Gure Gauzak S.A. | Taula gainean »

Hamaika bizimodu / Rafa Ugalde / Ibaizabal, 2003

Adibide batzuk Javier Rojo / El Correo, 2004-03-03

Rafa Ugalderen lehenengo liburua da “Hamaika bizimodu” izenburutzat duen idazlan hau. Bertan, hamar ipuin biltzen dira, antza, idazlearen inguruko errealitatean oinarriak dituztenak. Rafa Ugalde idazle gazteen sail definigaitzean sartzerik ez badago ere, egile hasi berritzat har dezakegu, idazteko zaletasuna eta grina, beste euskal idazle batzuek zaletasun eta grina hori alde batera uzten adinarekin sartu baitzaio. Datu honek azal dezake liburuak batzuetan uzten duen inpresio kontraesankorra: alde batetik, lehenengo liburua izanik ere, ohi baino idazlan helduago baten aurrean gaude; bestaldetik, ipuinen artean desorekaren bat dagoela iruditu zait. Izan ere, helduen kezkak eta ikuspuntuak eskaintzen ditu idazleak, eta hau eskergarria da, pairatzen dugun kulturaren nerabetze prozesuan. Izenburuarekiko kontraesana izango balitz bezala, “Hamaika bizimodu” hauetan dauden kezken artean heriotza nabarmentzen da. Baina ipuin batzuetan nabarmenegia ematen du aldez aurretiko ideia baten presentziak, halako moldez, non ipuinak adibide baten bidez egindako ideia horren garapena baitirudi. Ipuinaren bidez ideia bat ejenplifikatu ez, baina istorio bat kontatu nahi duenean, ordea, emaitzak interesgarriagoak iruditu zaizkit.