susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Derrotaren fabulak | Bertso-paper printzatuak »

Urrezko maskaradun erregea / Marcel Schwob (Periko Diez de Ultzurrun) / Pamiela, 1986

Urrezko maskaradun erregea Iñaki Camino / Argia, 1986-07-20

Ideia ezinobea Pamielakoena halako idazlearen narrazio-liburua kaleratzea. Ez omen da hau bere libururik ezagunena, “Narraciones imagnarias” nahiago baitu beste jende askok. Guk dena den, iritziak alde batera utzirik, liburu hau aurkeztuko dugu.

Itzulpena Periko Diez de Ultzurrunek egina da, hizkuntza oso zaindurik dagoela ikusten da, lexikoa batez ere. Basanabarre inguruko hizkeraren indarra erabatekoa da morfologiaren nahiz sintaxiaren aldetik.

Ipuinei dagokienez, esan dezagun, fantesiaren eta abenturaren bidea maite duela idazleak, modernitatearekin lotu gai guti ageri baita.

Deskrizio oso landuko testuetan, girotze kronologikoak bere pizua du, jazkera nahiz arkitekturaren aldetik. Ipuinak gehien bat motzak dira, 2 eta 3 orrialdetakoak.

Adan eta Eba berriak, lurra suak hartzen duen lurraldean salbatzea lortzen duten bakarrak; odol koloreko basamortuan, gizonak maitasunez hil eta baltsamatzen dituzten emakume libiar eder eta misterioz beteak; Etiopia inguratzen duten harea desberdinetako bederatzi zirkuluak; begirada gaizto eta intziertoko neskatila bular-txapalak; legenak lotsatuta erregetzari uko egiten dioten erregeak; bufoin maltzurrak; lurra izoztutakoan jaki bila iparralderantz abiatzen diren gizon zintzuak; izurriteak; izpiluek engainiatuta beren burua itsusia delakoan urkatzera doazen milesia birjin ederrak; gatz kontrabandistak; loak harturikako hiriak eta hauek bezalako hamaika abentura eta irudimen apartako saioak.