susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Olerki-liburu barria | “Peru Leartza’ko” Txillardegi’ren liburua »

Bitargi / Jaime Kerexeta / Izarra, 1960

Bitargi Luis Mitxelena / Egan, 1960

Hemen aipatu nuen Orbelaken ondoren (ikus iazko EGAN, 99-100 orrialdeetan), laster irten da Arantzibiaren bigarren olerki liburua. Itxura apain baino apainagoan dator, mamiari dagokionez. Lauaxeta zenaren Arrats-beranen eite garbia duela esango nuke.

Arantzibiaren bide eta joeraz mintzatu nintzen hemen, esan dudanez, eta ni baino burupe gehiagorekin mintzatzen da orain Aita Onaindia olerkaria Bitargiri ipini dion hitzaurre egokian. Ixilik geldituko banintz ere, ez luke, beraz, inork deus askorik galduko.

Era ikasian eta jakintsuro, herri poesiaren bideetara jo du itxuraz Kerexetak eta zentzuen bitartez atzematen duena da nolazpait ere bihotzeko izkutuen argibide eta ezaugarri. Elkarren ondoan datoz irudi biziak, esaldi laburretan, ur hegiko lizar nahiz makal lerdenen andanak bezala. Zeruan eta olerkariaren gogoan ez da gelditzen giroen eta orduen dantza arina: goizeko eguzki argia, laino euritsua, ilunabar xamurra, izartxoen keinua.

Norbaitek esango du agian aire bat darabilela beti Arantzibiak, nahiz doinua zertxobait aldatu. Egia izanik ere, nork agin diezaioke olerkariari gogoan ez duena kantatzerik? Bestelako soinurik nahi duenak, jo dezala berak danbolina.