susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Suite osagabea | Idazlea, irakurle »

Bizien gaubeilan / Txiliku / Elkar, 2011

Bizien gaubeilan Lurdes Imaz / Aizu!, 2012-02

Hogeita hiru istoriok osatzen dute Jesus Mari Olaizola Txilikuren (Zarautz, 1951) azken lana. Askotariko pasadizo eta istorio labur aurkituko ditugu bertan, batzuk berari gertatutakoak, moldatutakoak besteak, baita egileak berak asmatutakoak ere. Horien artean ditugu gazte garaian Amsterdamen izandako bizipenak maiteari kontatzen dizkion gizonaren istorioa, edo poliziaren atestatu itxuran kontatzen duen liburuaren hasierako gertakaria. Baita Paraguaiko blogari baten bidez ezagutuko dugun krisozionantropia delako gaitzaren kontakizuna ere, edo txinera klasera doala bi ertzainek kalean gelditu eta ezagutze saio batera joateko agindua jasotzen duen lagunaren pasadizoa.Hurbiltasuna da nagusi istorio labur hauetan. Hala, Donostian, Zarautzen edo Orion kokatzen ditu kontakizun batzuk, baina badira urrutirago gertatutakoak ere: Poloniako herrixka batean, Lisboan, Veguellina de Orbigon…

Hildakoei egiten zaizkie normalean gaubeilak, baina badaude, idazlearen ustez, bizirik daudenei egiten zaizkienak ere: seme edo alaben zain, gauean lorik ezin hartuta egoten diren gurasoek egiten dituztenak, esaterako. Giro hori nabari da liburuan zehar, batez ere azken kontakizunean, eta hortik atera du egileak bildumaren izenburua. Ipuinak eta istorioak idazten aditua dugu Txiliku, hainbat lan argitaratu baititu haur eta gazte literatura arloan ere.