susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Onkoteak | Marinel zaharrak »

Bertso bilduma (Zuberoera-batua) / Piarra Topet Etxahun / Elkar, 1987

Bertso bilduma Xabier Mendiguren / Argia, 1988-02-07

Aurreko batean, Etxahunen biografia nobelatuaren iruzkina zela eta, iragarri genuen bezala, kaleratu berri da bertsolari barkoxtarren bertsoen bilduma. Prestatzailea, biografia haren egile bera dugu; Xipri Arbelbide langile fina. Bi lanak liburuki bakar batean emateko asmoa omen zuen, baina lodiegi suertatuko zen bildurrez, azkenean banatuta eman behar.

Izan ere, elkarren osagarri eta edergarri baitira Etxahunen bizitza eta bere kantuak. Batak bestea gabe, galdua luke bere xarma eta indar guztia. Poztekoa da beraz, elkarren segidan etorri izana.

Xiprik berak aintzin solasean aitortzen duenez, bere lan hau Jean Haritschelhar irakaslearen tesiaren zordun da, hura gabe ezinezkoa baitzatekeen hau agertzea. Eta honakoa zabaltze eta ezagutarazte lan den aldetik, bertso hauetan sakondu nahi duenak iturri hartara edota Yon Etxaidek egindakoetara jo beharko du.

Liburu honetan ez zaigu inolako azterketarik egiten, ez hizkuntzazko ez historikorik, ezta oharrik ere. Etxahunen kantak ezagutaraztea du helburu, eta kontuan izanik zuberera beste euskalkietarik aski desberdina dela eta joan den mendetik gizartea bera ere arras aldatu dela, zubererazko bertsoen aldamenean Xiprik batuaz egindako moldaketa dator. Gogora datorkigu aspaldi batean Etxaidek gipuzkeraz jarri zituela.

Beraz bada, hementxe duzue liburua. Garai batekoak bezala gaurko gogoak ere bortizki inarrosten segituko dute Etxahunen kantuek, irudi duenez.