susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bianako Printzea, kondaira madarikatua | Txurio Txoria »

Kazetari-lanak / Xabier Lizardi / Erein, 1986

Kazetari-lanak Mikel Mendizabal / Argia, 1987-02-08

Ezagutzen genituen Xabier Lizardiren hitz lauzko artikulu asko lehen ere, baina euskarazkoak denak. Oraingoan, haren emaitza guztia, erderazkoak barne, eskaini digu Lurdes Otaegik, txukun askoa, dena esatera.

Aitzol eta abarren garai urrun eta gure begietarako beharbada mistiko haiez iritzi hotz eta zehatzagora garamatzate kazetaritza-arloko lan hauek, literatur nahiz politika-egoeraren berri aski argiaz jabetzen gara ta.

Euskal egunkaria noraino zen utopia, euzkel-egunean neska-mutil kozkorren erantzun eta euskal azterketen egokitasunak Joxe Mari Agirre bozkarioz zelan betetzen zuten, Mis Espana gaztetxoa Donostiara ekarri zutenekoan luma ironian bustirik esaten dituenak, literatur-kontuak, orduan ere hemengo egunkari erdaldunek euskal kulturarako zuten itsukeriaz…

Giroaren ezagupena izaki behinena, Lizardiren estiloa aipatu behar da, gutxik bezala bait zerabilen euskara sortuz gero ikasiagatik ere.

Ororen gainetik, Lurdes Otaegik burutu edizioa nabarmendu nahi genuke, 1927-1933 bitarteko artikulu guztiak batuz, hurrenkera garbian emanez, lana tajutuz eta gozoro eramanez. Lauaxetarenak atera zituzten Labayrutarrek, Aitzol ere atera dute aurten Ereingoek berek. Orixe Azurmendik. Ederki goaz.

111 artikulu zenbatu ditugu (3 hutsen gorabeheraz). Gerra aurrean Yoseba Mirena Markiegik atera “Itz-Lauz”-i lengusu bikaina irten zaio Lurdes Otaegiren eskutik.