susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Zirriborroak | Klasikoa »

Isturitzetik Tolosan barru / JosAnton Artze / Pamiela, 2007

Isturitzetik Tolosan barru Goizalde Landabaso / Radio Euskadi, 2007-06-17

40 urte eta gero hautsa kendu eta argia ikusi du olerki liburu berezi honek. Abangoardiako liburu garaikidea da zalantza barik; eta pentsatzen dut 40 urte eta gero abangoardiakoa izaten jarraitzen badu, denboratik at bidea egingo duen liburua izango dela. Klasikoa esan nahi diozu? Ba klasikoa. Nire lankide batek esan luke, Ex-tenpore dela.

“Nere ama hil zait lanak itota. Lanaren amoreagatik hil zait / zertarako dan bizitza / jakitera iritxi gabe. / Izeba ere hil da. / Era berdinean hil da izeba.”

Lehenengo argitaratze hura arroztasunez hartu zuten, euskaldungotik urrun zegoen zerbait bailitz. Urteak igarota norbaitek desafasea aurki diezaioke, baina nik uste dut egotekotan berbak idazteko orduan aurkituko niokeela, ez beste ezertan.

“zu / zutaz / zu / zugan / zugan zegoen / zugan zegoen sua / zegoen sua / sua / zuritzen / zu / zuri zu / zure zuria zuritzean / sua / zurituaz zu xuri.”

Ez da bakarrik berbekin jolas egitea, letren moldea aldatzea, cd-ak sartzea, liburu lineala ez izatea finean. Gehiago da.

“Bi kate / biak ebaki beharrezkoak / bat gorputzaren bizitzeko / bestea gogoaren askatzekoa”.

…eta zenbait olerki irakurtzen ari zaren bitartean zeure burua abesten aurki dezakezu. Berrogei urteko kanta al da? eta bai, bada.

Arteola-ren edizioa da ber-argitaratu den hau. Askok duela 40 urte bezala, arrotz hartuko du, “zoro-lana” esango dio askok.

Bidaia bat da; hitzek gidatutako aldats gora eta behera. Zoazen edo zatozen oso argi ez dago, baina axola al du horrek? Bidaiaren gozamena da garrantzitsuena.