susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« “Uskeriak” | Jolasak »

Dirua galgarri / Mariano Izeta / Auspoa, 1962

Dirua galgarri Luis Mitxelena / Egan, 1962

Loidi lehen bezala, polizi nobelan abiatu zaigu Izeta bere aurreneko urratsetan, atseginez eta nekerik gabe irakurtzen den irakurgai honetan.

Ez dio irakurleari, korapilo bihurria more geometrico nahaspildu ondoren, ezin askatu ahalako buru hausterik eskeintzen. Ez zaizkio gehiegi atsegin Izetari gogorkeriak eta odol ixurtzeak ere. Bestetan Loidiz esana berresatea zilegi bazait, ez du honek ere Dashiell Hammettekin ezaupide luzerik.

Ez du, bada, irakurgai honek inoren ilerik laztuko, nahiz eta loak hartzerakoan irakurri. Are gehiago: badirudi polizi gaia ez dela hemen aitzakia polit bat besterik. Hori dela eta, eta hauxe da axola zaiguna, kontakizun xotil eta paketsua, ez luze, ez labur, bai bien erdiko, hariltzen digu Izetak Baztango hizkera txukunean. Luzaroan dabilela opa diogu oin arinez abiatu den bidean.

Aitzin solasean, A. Irigarayk hitz dotorez goraipatzen ditu Baztango idazle prestuak.