« Urrutiratze | Poemen omenez »
Etxe hutsean / Karlos Linazasoro / Alberdania, 2009
Gurasoen etxea Javier Rojo / El Correo, 2009-07-04
Karlos Linazasororen azken poema liburuak bere bizitzako gertakari zehatz eta mingarri batean du abiapuntua liburu honek: gurasoen heriotzan, hain zuzen. Guraso biak galdu ditu poetak denbora gutxian eta bera bueltatu da haien etxera, eta bisita hori egiten duen bitartean, bere begiradak etxean ohikoak ziren objektuak aurkitzen ditu, itxura berri batez hornituak. Objektu horiek ere umezurtz geratu dira, gauza horiek guztiek gurasoen presentziarekin baizik ez baitzuten zentzu osoa hartzen. Gurasoen faltan idazlea saiatzen da beraienak izan ziren objektu txiki horietan haien presentzia bilatzen eta presentzia horren bila doalarik, erregresio batean murgilduko balitz bezala, haurtzarora itzultzen da. Gurasoen etxera bueltatzeak, gurasoen objektuak ikusi eta berriro sentitzeak, objektu horiek bere oroitzapen propioekin lotzen ziren puntura eramaten du. Orduan, helduaren ikuspuntua alde batera utzi eta ia-ia umearena dirudien begiradarekin elkartzen da berriro ere objektu horiekin, bere oroitzapen xaloetan ere aurkitu nahi baitu gurasoen presentzia. Edozein etxetan aurki daitezkeen gauzak aipatzen dira eta beren sinpletasunean ere beren jabeen historia islatzeko ahalmena dute: argazkiak, armairuak, oheak… Gauza horiek eraikitzen duten ardatzaren inguruan poemak sortu eta poemekin batera oroitzapenak eta sentimenduak berpizten dira.
Molde desberdineko olerkiak eskaintzen dira idazlan honetan; flash moduko haikuen itxurako ahapaldi laburren ondoan, erromantzeren bat edo sonetoren bat ere irakur dezakegu. Edonola ere, poema hauek ez diote konplikazio nabarmenik planteatzen irakurleari, eta honek esfortzu handirik gabe irakurriko ditu, interpretatzeko lan berezirik egin gabe. Ez dago sinbologian gehiegi arakatu behar, dena, hitzetatik irudietara, gardena baita. Bertako osagaiek ez dute sorpresa handirik ematen. Liburuaren asmoak, dena den, topikotasuna bigarren mailan uzten du. Liburua gurasoei egindako omenaldia denez, poetak, batetik, bere burua biluztu eta bere sentimenduak eskaintzen ditu, eta bestetik, haurraren begirada berreskuratu nahi du gurasoen etxean unibertso osoa zen garaira itzultzeko asmoarekin.
Gizon barregarriak
Joxean Agirre
Asier Urkiza
Barbaro iraun
Louisa Yousfi
Amaia Alvarez Uria
Izotz ura
Lide Hernando Muñoz
Aiora Sampedro
Palestinaren okupazioaz eta kolonizazioaz
Perry Anderson
Irati Majuelo
Itzulerak
Miren Agur Meabe
Aiora Sampedro
...eta gauetik, euria
Fertxu Izquierdo
Jon Jimenez
Carvalho Euskadin
Jon Alonso
Asier Urkiza
Hitzak palmondo
Silvia Federici
Nagore Fernandez
Altxa, hildakoak
Fred Vargas
Ainhoa Aldazabal Gallastegui
Alderdi komunistaren manifestua
Karl Marx / Friedrich Engels
Aritz Galarraga
Maitasun kapitala
Karmele Jaio
Mikel Asurmendi
Larrosa bat Groenlandian
Iban Garro
Paloma Rodriguez-Miñambres
Jausiz
Alain Mendizabal Diaz
Maddi Galdos Areta
Hiriak eta urteak
Xabier Montoia
Irati Majuelo