kritiken hemeroteka

6.995 kritika

Azken kritikak

« | »

Koaderno gorria / Arantxa Urretabizkaia / Erein, 1998

Zubi etenak Aingeru Epaltza / Nabarra, 2002-02

“Zuen ama naiz. Zu, Miren eta zu, Beñat, nigandik jaio zineten, duela hamahiru urte eta hamar urte. Duela zazpi urte desagertu egin zineten, zuen aitak nigandik lapurtuak. Hori da nire egia, hori eta ez dakidala zer kontatuko zizuen aitak niri buruz…”

Irudipen okerra izan daiteke, beharbada, baina nago aitatasun edo amatasun sentimenduek, literatura guztietako gai handietarik izan arren, ez ote duten berriki arte leku murritza izan euskaraz idatzitakoan. Literatura gazte eta —beraz— aurreritziduna izatearen ajeak dira noski, idazlearen aldetik gutieneko ezagutza zuzena komeni duen alor baterako. Hartara, heldutasun seinalea bada —literaturarena nahiz idazleena—, pixkana-pixkana gure artean horrelako gauzez idazteko lotsarik ez duen jendea egotea.

Amatasunaren indarra da Arantxa Urretabizkaiaren “Koaderno gorria-ren” ardatza. Emakume batek —sasian dagoen militantea bera—, erbeste kontuak direla-eta senarraren eta seme?alaben arrastoa zazpi urtez galduta, Venezuelan direla ikasiko du, baita senarra berriz ere ezkondu zaiola ere. Berak harat ezin joanik, abokatu lagun bat igorriko du, emakumea hau ere, haurren eta bere artean “zubi etena” berreraiki dezan. Ahanztura etsai duelakoan, emakumeak “koaderno gorria” idatzi du, banaketa baino lehenago seme?alabekin izandako biziaz. Orri sorta hori haien eskuetan uztea da, zehatz-mehatz, lagun abokatuaren egitekoa.

Bi boz tartekatzen dira liburuan. Batetik, emakumearena, koadernoaren bidez ematen zaigu. Bertzetik, narratzaile omniszientearenak bigarren emazteki horren ibileren berri ematen digu Caracasen barna, ahantzi gabe koadernoaren beraren irakurketak harengan pizten dituen erreakzioak: noiz harridura, noiz desadostasuna eta are arbuioa, noiz hunkipena eta atxikipena.

Arantxa Urretabizkaia ez da etorri berria gure letretara; ofizio aski du bizkar gainean, istorioak kontatzeko zeregin gaitzean. Ez du hizkuntzaren pirotekniaz irakurlea txunditu nahi, haren bihotzera heldu baizik, hizkera zuzen eta lehen behakoan apaindurarik gabea erabiliz. Xinpletasuna irudi lezakeena lantze prozesu gogor baten ondorioa da, alabaina. Hitz guti eta iduriz biluzietan zenbat gauza adieraz daitekeen erakusten digu behin eta berriz liburuko orrialdetan zehar.

Euskal Herriko gatazka politiko delakoak bere protagonista eta haien ingurukoen bizietan utzi/uzten dituen ondorio suntsitzaileak liburu bat baino gehiagoren abiapuntua izan dugu, hondar urteetan, euskal literaturan. Guti, ordea, hau bezain hunkigarria.

Azken kritikak

Biennale
Beatriz Chivite

Igor Estankona

Demokraziaren pribatizazioa
Jule Goikoetxea

Peru Iparragirre

Azala erre
Danele Sarriugarte

Javier Rojo

6012
Karlos Linazasoro

Aiora Sampedro

Filiala
Sergei Dovlatov

Joannes Jauregi

Zaldi mamarroa
Ekaitz Goienetxea

Iratxe Esparza

Bihotz handiegia
Eider Rodriguez

Hasier Rekondo

Pelegrinak
J.E. Urrutia Capeau

Javier Rojo

Zaldi beltzak zeruan
Txomin Peillen

Peru Iparragirre

Tiroa kontzertuaren erdian
Belen Gopegui

Aritz Galarraga

Zaldi mamarroa
Ekaitz Goienetxea

Javier Rojo

Zauri Bolodia
Oier Guillan

Aiora Sampedro

Azala erre
Danele Sarriugarte

Joannes Jauregi

Jainkoen zigorra
Alberto Ladron Arana

Iratxe Esparza

Artxiboa

Apirila 2018

Martxoa 2018

Otsaila 2018

Urtarrila 2018

Abendua 2017

Azaroa 2017

Urria 2017

Iraila 2017

Abuztua 2017

Uztaila 2017

Ekaina 2017

Maiatza 2017

Hedabideak